孖妹缸湖遊：陸東同你斟世界

陸： Look's Asset Management董事總經理兼投資總監陸東

吼平靚貨減少買賣

高妹：愛爾蘭終於獲歐盟掟出850億歐元作援助，另一邊美國與南韓就冷淡回應中國提出嘅六方會談，你有乜嘢睇法？

　陸：其實最緊要大家都覺得歐盟救咗愛爾蘭之後，葡萄牙會冇事。至於朝鮮半島問題，中國都出咗聲啦，呢個世界唔會打仗㗎！呢啲負面因素短期對港股會有困擾，不過現時恒指PE（市盈率）只有14倍，估值合理，大家可以買股票囉。

祺祺：你話自己信奉價值投資，咁咪與「股神」巴菲特一樣？

　陸：我唔知喎，但我只會買價錢平、質素好嘅股票。散戶唔好做經常性買賣，我做基金經理都唔會成日騰出騰入喇！總之大家應盡量減少買賣，減少交易成本。

高妹：炒股要「低買高沽」真係難過登天，唔知點樣先賺到大錢！

　陸：重點係把握市場轉勢，其中要點就係你要充分掌握企業盈利數據，好似現時息口咁低，美國經濟短期唔會有起色，未來中國經濟都要靠內需而唔可以繼續依賴出口，呢啲因素對散戶捕捉市場大勢都有幫助。

抗通脹揀「加價股」

祺祺：近期我同高妹出街買嘢，發現衣食住行都加晒價，不如你畀啲抗通脹小貼士我哋啦！

　陸：抗通脹不外乎購買實質資產，如買股票同買樓。買股票要揀啲喺通脹環境下都加到價嘅，所以唔好買公用股，好似近期載通國際（00062）嘅九巴話加價，啲人又開始嘈嘞，實際上油價真係貴咗喎，但礙於影響民生，咁佢又加唔到價喇。

高妹：咁你依家喺生活上又有冇使少咗錢呀？

陸：我不嬲都「孤寒」㗎！近期油價貴咗，我都即刻換咗部環保電動車。

投資講座分享

講完大市，之前陸東喺一個投資講座中，亦與散戶分享咗唔少個人睇法，都好值得留意。

美元係「草紙」價值低

Q：喺「十二五」規劃下，你對基建股有乜嘢睇法？

陸：我一向對中國基建股比較審慎，原因係以往利潤偏低，以及好大程度上屬於政治工具，經營上未必係商業運作。

Q：你點睇中國保險股及藥業股？

陸：中國保險市場係新興市場，現時太保（02601）股價便宜，但其員工生產力比平保（02318）低好多。平保現價90幾蚊，我又覺得值博率唔算太高，而財險（02328）亦都係好貴。至於藥業股就係「貴夾亂」。

Q：你點睇最近美元反彈？

陸：美元隨時見頂，因為我覺得美元係「草紙」，你印畀我嘅。早前俄羅斯搞咗個「保護老虎國際論壇」，連中國總理溫家寶都去喎，但佢行出嚟唔係講點樣保護老虎，而係講以後中國及俄羅斯實現雙邊貿易計算，暗示叫美元行開啲，唔好阻住晒。中國與巴西、泰國、新加坡都有呢個協議，但唔代表人民幣今日喺國際上自由兌換，只係人民幣相對其他貿易夥伴有一定地位，可見中國積極減低對美元依賴，當你見到老細猛咁做嘢時，就知投資美元價值何其低。

大市距離見頂仍遠

Q：朝鮮半島局勢緊張，如果打仗，即係金價會升？你又點睇澳元？

陸：如果打得成仗，咁咪美元、油價、黃金齊升囉。現時南韓與澳洲嘅負債比率偏高，令投資風險增加，如果你同緊韓國佬做生意就一定要小心，真係收到錢先好放貨。投資澳元亦要小心，因高息等於高風險。

Q：有乜嘢方法可以令我哋喺泡沫爆破前全身而退？

陸：呢個問題係高科技喎。某日我同一個世外高人食飯，佢話如果當大市成交等於市場總市值1%時，大市就離頂不遠嘞，我聽咗之後都好錯愕，但係咪真就要時間去驗證。銀行私人貸款增長率勁升亦係一個見頂訊號，近排我收到銀行嘅電話，成日話有30萬元等住我去借，即係離見頂仍然好遠啦。

陸東「星級股」推介

星級股 看好原因

建設銀行 （00939） 估值平，現價未反映潛在價值

招商銀行 （03968） 估值相對於建行較貴，但賺錢能力仍高

領匯房產基金 （00823） 全港最大、做獨市生意的「舖王」

安踏體育 （02020） 近期股價跟隨同業下滑，業務可超越對手李寧（02331）

香港交易所 （00388） 本港唯一合法「賭場」，未來陸續有新股來港上市

合景泰富 （01813） 估值平，樓盤質素佳，賣樓方法成功

冠君產業信託 （02778） 睇好香港寫字樓及地舖租金

太平洋航運 （02343） 現價便宜，管理層識得做生意

X安碩A50 （02823） 預期A股兩年內可升一倍，有利股價

35.3%人估恒指 最少二萬五收爐

港股踏入最後一個月，各大行對本月港股表現眾說紛紜，你認為恒指十二月最終收報幾多點？據今期《東方產經》網上民調截至上周末晚上6時嘅結果顯示，10%人選「22,000點或以下」，13.8%人選「23,000點水平」，40.9%人選「24,000點水平」，其餘35.3%就選「25,000點或以上」。

高妹、祺祺

若有料報畀高妹同祺祺或有嘢問，可電郵money.biz@opg.com.hk