喺電影《食神》入面，周星馳有句好出名嘅對白：「畀你估到，我仲係食神。」現實生活中，阿里巴巴（01688）主席馬雲就話畀大家知：「畀你估到，我仲係馬雲！」早幾日絲絲睇到馬雲減持深圳創業板公司華誼兄弟300萬股，套現超過9,000萬人仔，而華誼兄弟方面嘅解釋話，馬雲減持係「為改善生活」，絲絲睇到都覺得呢個答法幾有創意。
不過阿里方面睇嚟唔係咁認同呢個答案，公司公關總監陶然更直斥「為改善生活」之說純屬胡說八道，仲話馬雲一向睇好文化產業及電影電視產業，並且會加大喺呢個領域嘅投資。至於馬雲點解減持呢？陶總監嘅答法係：「喺阿里巴巴十年幾嘅歷程中，馬雲經常有好多奇思妙想，事後大家先恍然大悟。呢個舉動（減持）係佢本人嘅想法，也許要到事後大家先能明白。」咁即話畀大家知，唔使旨意估到馬雲做決定嘅動機，因為佢係馬雲。
余絲韻