依家內地最熱嘅話題不外乎係通脹壓力大，中央絞盡腦汁要壓抑通脹情況及應付人民幣升值壓力。聯想集團（00992）主席柳傳志近日就有個嶄新嘅提議，話說佢日前出席喺武漢召開嘅「聯想之星創業大講堂」，演講期間佢提到近月海關對超出部分嘅個人自用進境物品徵稅，認為呢項措施並唔合理。
柳總話依家內地咁多外匯儲備，對人民幣造成升值壓力，亦推高通脹水平，佢認為應逐漸提高進口數量、促進國民消費；通過消費將外匯消耗，可以減輕人民幣嘅升值壓力。
柳總形容，老百姓好地地過關買幾千蚊嘢都要收稅，賺呢些少錢做乜？
佢話按道理大家要寫封信畀政府問吓，仲覺得應該自己先寫添。絲絲身邊好多內地朋友都覺得呢項徵稅措施好唔合理，但人微言輕，依家有大企業領袖為大家發聲，唔知政府會唔會接納民意呢？
余絲韻