好多人都知勤+緣（02366）行政總裁梁鳳儀一向做事都親力親為，朝着成為內地跨媒體外資公司嘅目標努力前進。咁啱尋日絲絲食飯撞到Dr.Leung，見佢精神麻麻哋仲聲沙沙，都忍唔住叫佢保重身體喇！佢就話自己好耐都冇放過長假，對上一次已經係15年前結婚嗰時，當時原本攞咗兩星期大假，不過唔係享受二人世界，反而係同埋屋企人一行16人開始郵輪海上之旅，點知一落船就收到急Call要返公司做嘢，結果大假只係放咗6日。
「女鐵人」稱號果然名不虛傳！Dr.Leung跟住就講個好消息，話自從公司新嚟咗個首席營運官同佢一齊睇住盤生意，自己工作量少咗啲，所以佢決定嚟緊會放7日大假輕鬆吓，今次同樣係成班人上船玩，一於重溫15年前嘅時光喎！絲絲估Dr.Leung今次應該仲開心，因為多咗新抱仔陪嘛！佢仲話依家董事局總共有18個成員，而且有10個高管至少有10年內地媒體工作經驗，加上好多都係相識多年嘅老朋友，做起嘢上嚟特別有默契，咁樣相信公司嘅成長應該會更快啦！
余絲韻