華創（00291）首席財務官黎汝雄（Frank）話佢成日要出差，主要係返大陸睇吓公司業務，有時與當地官員閒談時，官員竟然話華創畀人嘅印象係「無法無天」及「夜總會」。Frank聽到好心驚，心諗我哋好依法守規o架喎，係咪有乜嘢誤會呢？官員笑笑口咁話冇誤會，喺華創做的確係「無法定假期、無星期天，老總成日喺三更半夜Call人去開會」。
Frank聽到呢個解釋，即刻放下心頭大石。不過佢都好認同，喺華創打工真係幾辛苦，好似去年思捷（00330）出售合營公司股份呢單「刁」發生之時，佢哋成個總部嘅員工團隊，有三日兩夜冇瞓過覺，真係做到死死吓，所以內地官員嘅睇法都冇錯o架。
做得咁辛苦，公司梗係唔會虧待員工，去年就請大家去大阪5天遊，今年仲加長到7日遊北海道添。至於人工有冇得加，佢就笑笑口話睇業績好唔好囉，咁即係十拿九穩啦！
佢仲話自己好享受去旅行時喺酒店游吓水同埋睇武俠小說，佢最鍾意睇金庸嘅《笑傲江湖》，而最想做嘅人物就係《鹿鼎記》入面嘅韋小寶，睇嚟武俠小說除咗可以令佢喺繁忙工作中放鬆，仲為佢帶嚟美好嘅幻想添。
余絲韻