恒指昨日先跌後升，成交略增至890億元，為十二月股市開個好兆頭。現時資金仍然睇住板塊輪流炒，零售股近期強勢延續，昨日鱷魚恤（00122）、JOYCE（00647）及堡獅龍（00592）均榜上有名。古晨認為，外圍市況未穩，現階段不妨吼有實業支持兼走勢較強嘅股份較穩陣。
好似隻中國海景（08065），其主業為產銷泡沫塑料（簡單講就係白色家電的包裝發泡膠）及蜂窩紙包產品，並提供綜合包裝解決方案，在內地同業中具領導地位，加上受惠於中央「家電下鄉」、「以舊換新」及能源產品補貼的政策，前景不言而喻。
事實上，集團今年首三季業績表現予人驚喜，期內營業額為3.92億元，同比上升44.1%；毛利同比升59.4%至7,045.8萬元，可見業務仍處增長期。再睇公仔圖，該股昨在大成交配合下突破下降軌阻力，大升17.07%，既然咁有氣勢，值得吼位買入博再試上次高位1.1元，穿0.85元止蝕。
古晨