市場熱線：國美隨時有後着

古勝近月都係睇住美匯指數做指標，恒指尋日下晝升勢亦係跟住美匯（跌穿81）。不過，道指連續兩晚喺萬一點失而復得，滬綜指喺2,800點亦係幾次穿咗又升番，恒指23,000點同係拗腰回升，可見中港美魚缸喺重要關口都撐得住。

管制物價又出招

祖國朝早就公布PMI，數字係7個月高位，但反而令孖屐驚加息，中港魚缸都低開，上晝收市仍係齊跌。下晝港股倒升，最勁嘅係收租股，和黃（00013）亦升4.25%收報81元，股價過埋大笨象（00005）頭。香港十月份零售升21%，賣衫股繼續威，最奇怪係冇隻股趁高抽水，六福（00590）派成績表、炒高、抽水三部曲一氣呵成。

祖國管制物價日日都有新招，尋日搵咗藥價開刀，搞到要減價嘅聯邦制藥（03933）大跌，奇在金活（01110）仍可再創新高；雖然話今次針對嘅係抗生素、心腦血管藥同外國藥，但祖國對醫藥亂收費一向視為眼中釘，年年醫改都冇辦法解決「看病貴」嘅問題，所以今次借住調控強迫減藥價，坊間估計仲有第二波。管制物價魔爪愈伸愈遠，但尋日奶品股死貓彈，澳優（01717）同環乳（01007）都升近一成。

在下尋日叫進取投資者可以博吓內房股，尋日卒之見有似啲樣嘅反彈，中央調控物價可以手起刀落毫不留情，但管樓價卻冇符，又唔敢好似香港政府咁狠辣。其實中央最狠一招並非房產稅，而係直接唔畀你加價，但又唔想鍊得太死。

落藥太重會有嚴重後果，本地樓市唔知幾時可回穩，但美聯（01200）繼續尋底，5.5元係二月同六月低位不容有失，古勝覺得跌到呢個位嘅話不妨博吓反彈，因為樓市衰極有個譜。

管制物價涉及都係民生必需品，斷估都唔會搞到電器，國美電器（00493）尋日再升近3%收報3.15元，同上月宣布「停火」當日收市價3.24元已相差唔遠，如果單純炒消息唔會有咁強嘅後抽力，所以國美一係基本因素獲認同，一係仲有後着。

已重返合理估值

和氣固然生財，古勝一早估到黃光裕一方可扭轉敗局，試問有阿爺撐腰邊個唔識時務？但貝恩資本嘅去向值得關注，會唔會甘心做第二大股東？陳曉會走定留低？停火唔代表唔會再開火，黃家如果重掌管治權，經營方針會唔會重行舊路？甚至坊間有估計，國美成檔嘢賣畀第三方就唔使煩，到時真係一天都光晒。

國美未來發展仍有好多變數，不過既然紛爭暫時解決，可以專心開新店同蘇寧拗手瓜，股價重返合理估值，再多一啲幻想會有後着，股價應該仲有力再上。

戰報

鱷魚恤（00122）+23%

詩詩周一推介鱷魚恤，當日低位0.85元，昨日股價高見1.05元，短短三個交易日升幅達23%。

中能控股（00228）+16%

古晨周一指中能有異動，當日低位0.465元，昨日股價高見0.54元，累積升幅有16%。

古勝