唔覺唔覺，恒指由高位回落差唔多有成1,800點，大家講嘅技術分析，例如：「死亡交叉」、10日線跌穿20日線似乎又唔太靈驗，無他嘅，平均線係可以做出嚟，大家唔好盡信。參考就梗係可以，其中重要嘅支持位22,524點係一定唔可以破，一日唔破都不宜輕易做淡，都係一樣繼續追蹤，小心市場蜈蚣彈。
回調市，唔等於休息，應該向有質素而又有能力推動下一個大浪指數飛升嘅股票勤做功課。內銀股就梗係首選啦！好似建行（00939）由高位回到近7元，已經有一個好明顯嘅回調，喺7.1元附近係第一個試入機會，當然放低一啲入就更加好，如果又借歐債唔掂，將建行推到6元附近簡直就係「黃金入球」嘅好機會，唔好走漏眼，中行（03988）都係有相同嘅估值同感應。
同時，半新股喺呢輪急跌之後，大家又要重新向佢哋嘅基本因素進發，因為大戶為求鎖住利錢，才毫不留力咁起勢沽貨，睇吓四環（00460）同長興（00238）畀人推到佢股價「低迷時」，不過可以咁講，呢兩隻股，有概念、有賣點，愈近招股價入市風險就更加低，不妨多加留意同跟蹤。
用衍生工具嘅朋友就要更加小心，因為市場波動令到投資者損手機會相對大增，不宜急進，等待真正嘅大波浪形成先至「股輪齊飛」，收到未！
香港大學電子金融服務榮譽助理教授 徐燦傑