台灣就快舉行地方選舉，呢啲時勢當地股市會比較靜，但尋日有隻叫碩禾嘅股份，由興櫃市場（好似深圳嘅創業板）轉板去櫃枱買賣中心（OTC）掛牌，股價曾經勁升40%。抽中呢隻股嘅散戶若然賣得好，隨時穩賺4.9萬元，認真和味。
或者大家仲記得早排台灣有隻iPhone概念股宸鴻，第一日上市就有投資者即賺7萬幾，成為「賺錢王」，碩禾雖然冇佢咁犀利，但投資者都有近5萬蚊進帳，呢支歌仔喺香港就冇得唱嘞。
碩禾以生產太陽能導電漿產品為主，係依家最炙手可熱嘅行業。原本佢哋係興櫃市場嘅一哥，股價接近700元（新台幣‧下同），依家以股價500蚊轉板，擺明係益街坊，搞到董事長陳繼仁嘅外母都去排隊抽（新股）埋一份。碩禾每手要價50萬元，入場費係歷來最高，但一開市就係咁升，收報661元，股價僅次於「股王」HTC。能夠首日躋身OTC就做「股后」，陳繼仁好謙虛咁話「會用平常心看待」，佢又話無論喺規模、資本、產品及獲利增幅，HTC至係真正「股王」。嘩！好識講嘢喎。
余絲韻