絲絲講場：擬遷後勤中心中銀揀灣仔「升呢」

今年本地有好多銀行都積極招兵買馬，大量增聘前線員工，反映銀行生意大有改善，除咗招聘大計之外，銀行後勤部門嘅策略部署，同樣可以被視為市好或市壞嘅風向標。絲絲收到風，中銀香港（02388）打算將佢哋位於奧運站上蓋嘅3層後勤中心搬去灣仔，喺好多銀行紛紛將後勤中心喬遷至東九龍及西九龍一啲非核心地區以減輕成本之際，中銀香港反而將佢哋嘅後勤中心搬到灣仔呢啲黃金地段，睇嚟佢哋業務應該做得唔錯。

據知中銀香港喺灣仔合和中心設有熱線中心，但該行發言人就唔肯透露，奧運站嘅後勤中心會搬去灣仔邊度。講開後勤中心部署，佢哋嘅對手獅子銀行喺上月底就以8.16億元投得沙田石門商貿用地，用作興建後勤中心以進一步發展香港業務。