絲絲講場：蒙古樓價3年升逾倍
咪以為香港及大陸嘅樓先至係貴，喺蒙古國呢個聽落都覺得遠嘅地方，當地樓價其實都唔輸蝕，部分樓盤嘅價錢，3年已經升超過一倍。絲絲尋日聽一間喺蒙古投資房地產嘅公司APIP Corporation介紹，佢哋話由於蒙古礦產豐富，帶動當地嘅經濟迅速咁增長，加上海外資金及人員嘅大量流入，令到當地住宅物業長期供不應求，而喺首都烏蘭巴托，出租物業嘅回報仲有成13%至18%，都咪話唔吸引！
每平米售2000美元
聽APIP常務合夥人Lee Cashell話，佢哋依家喺嗰度已經賣咗4個高端嘅住宅發展項目，其中喺近期落成嘅Regency Residence，部分單位每平方米價格就喺3年內由800美元升到1,800美元。佢又介紹，嚟緊公司喺烏蘭巴托嘅第二個多用途物業發展項目The Olympic Residence將會落成，呢個項目每平方米賣2,000美元，包括開放式單位及頂樓套房，而最低3層就用作大型商業及辦公室用途。
余絲韻