「股神」巴菲特投資成績勁，做慈善又瞓晒身，白宮就剛啱宣布將會頒發本年度美國最高榮譽嘅總統自由勳章畀佢，表揚佢樂善好施嘅精神以及傑出成就。與「股神」一齊攞到呢個獎嘅有14位名人，包括美國前總統老布殊（表揚佢長期服務國家）、德國首位女總理默克爾（表揚佢喺政經界嘅成就）以及世界知名嘅華裔大提琴家馬友友等。頒獎典禮會喺明年初於白宮舉行，並由美國總統奧巴馬親自頒獎。
白宮讚揚「股神」係美國人嘅投資家、工業家及慈善家，簡直係美國人嘅傳奇。
「股神」早幾年與微軟蓋茨一齊搞咗個名為「捐款誓言」嘅慈善活動，承諾死後捐出九成九嘅身家，仲鼓勵其他美國富豪捐一半身家出來，呢份善心真係唔係個個有錢人都做得到，所以獲授勳真係實至名歸。
「股神」一知道自己獲得咁高嘅榮譽後，就「禮尚往來」，即刻喺《紐約時報》登咗篇感謝信畀奧巴馬，除咗感謝頒呢個獎畀佢之外，仲稱讚奧巴馬喺金融海嘯時表現出色，成功帶領美國人走出困境咁話喎！
呢頂高帽仲笠埋伯南克、蓋特納及小布殊，「股神」話如果唔係佢哋夠果斷，依家美國可能輸淨南瓜同埋老鼠。
不過呢封信唔係個個都受落，即刻有網民將封信嘅內容改寫，盡顯民間對政府政策助紂一班華爾街貪婪「賓卡」嘅不滿，其中一句最精警嘅係：「如果不是你（政府），這個世界會完全不同，會比現在好得多！」
余絲韻