期指觀瀾：入市宜作兩手準備

中國表示可以採取臨時物價控制來壓抑通脹，紓緩市場對短期落重藥，亞洲股市及商品價格大反彈，港股最多升457點，最後收報23,637點升422點。美中不足，係連續幾日跌市成交在千億樓上，尋日反彈反而得番923億元，期指好友似乎都擔心反彈浪唔夠穩陣，期指在現貨收市後跌番超過50點，收報23,537點。

今浪係中線調整完成？再展升浪，抑或純粹一次死貓彈？相信恒指在23,866至23,899這33點之間阻力，能否順利收復十分關鍵，23,866點乃八月中至十月中的第一波升浪高位所在，升唔穿，隨時營造一次頭肩頂右肩，再向下俯衝。至於23,899點，則是20,372點升到24,988點的0.764黃金分割線所在，現在也是升浪的阻力所在。

未來幾日筆者會做好兩手準備，一旦升穿這重要阻力帶，並且收市企穩阻力樓上，大市有機會挑戰24,988點甚至更高水平，不妨再開好倉揸貨，否則，如果是一試即回，中期調整可能未完，大可再以四分之一至二分之一注碼，即市試沽。

John Mullen

跨媒體地產網新居入伙 幾萬個精選樓盤 歡迎睇樓！

Money18新功能「18好路數」為你預測心水股票升跌機會率

Money18更多即時港股指數資訊