市場熱線：湖南有色物有所值

完成調整言之尚早

尋日港股主要係二至九線股發威，好多股已收復呢幾日嘅失地，尤其零售股靠莎莎（00178）成績好帶動又升過，賣衫賣鞋嘅漢登（00448）、I.T（00999）同利信達（00738）等上晒升幅榜，棉花價格回軟對賣衫股算係好消息。藍籌股因為地主股唔生性，所以拖累恒指，祖國移動（00941）收市仍要跌，買着佢都幾悲哀。

本地魚缸尋日翻生主要多得外圍，美匯指數升得咁上下遇到壓力，執筆時已回到78.5，好多人睇死美匯冇辦法過到80呢個重要阻力。

另外，愛爾蘭坐低同歐盟傾援助，歐債危機又可以暫時拖住，留番下次再做質低藉口。日股、歐股、道期尋日全線上升，總算還得神落。

不過，話港股已經完成調整係言之尚早，依家有中國加息同歐洲長命債牽掛住，美金走勢亦好反覆，而QE2效應已炒完，唔似早排咁海闊天空，所以古勝認為個市會傾向波動，唔可以睇單邊；窩輪同牛熊證尋日成交相當犀利，個市愈波動愈啱賭徒。

今次溫總出招主要集中農產品，糧食佔窮人生活開支最大部分，想「河蟹」就不能不管。四大措施合情合理，嚴禁炒賣，除咗天然氣要價格「穩定」之外，對其他資源金屬價格並未提到，尋日內地金屬期貨價格全面反彈，農產品期貨則有棉花同豆油微跌。本地上市嘅資源金屬股尋日反彈係順理成章，中信大錳（01091）掛牌擇咗個好日子，但之前新股「3連破」，好多散戶喺開市冇耐已心急「止蝕」。

將打造為資源旗艦

金屬股有好多隻，有礦嘅先係寶，祖國前排公布將稀土、鉬、鎢、銻等10種稀有資源列為保護性開採礦種，刺激湖南有色（02626）同洛鉬（03993）急升，前幾日個市急回，湖南有色股價已補番上升裂口。話晒係受保護資源，無論金屬價格點樣升升跌跌，物以罕為貴之下會相對硬淨。

湖南有色主要礦產係鎢、銻同鉍，用於國防、航天、汽車部件等重工業。五礦集團今年用「賤價」收購湖南有色，但隨住金屬價格上升，呢次收購更加物有所值。

五礦諗住搵湖南有色做內地旗艦，前排仲同株洲政府簽咗「共建有色金屬新材料精深加工株洲基地」MOU，規模預測每年銷售收入達500億元，湖南有色嫁着個好人家，呢次飛上枝頭變鳳凰！

戰報

耀萊集團（00970）+9%

古晨尋日推介耀萊，股價平開，低見1.37元後愈戰愈勇，最高過1.5元，即日最多升9.5%。

中國建築（03311）+7%

小尾尋日推介中國建築，股價開6.03元，之後扶搖直上，最高見過6.5元，即市升幅達7.8%。

古勝