所謂巾幗不讓鬚眉，今時今日好多女性都能夠獨當一面，好似剛啱公布嘅《金融時報》全球50大商界女強人，每位上榜嘅女性都係大企業「揸弗人」，其中有12人來自亞洲，而隨着我哋嘅祖國經濟日益強大，今年更有6位中國女性上榜！
今年繼續由百事CEO努伊蟬聯冠軍寶座，美容產品製造商雅芳嘅鍾彬嫻以及土耳其Sabanci控股嘅薩班斯就分列第2及第3位，其他出名嘅公司好似卡夫食品嘅羅森菲爾德、雅虎嘅巴茨、淡馬錫嘅何晶以及Burberry嘅阿倫特亦榜上有名。
來自大陸嘅女強人，排名最高係排第5位嘅格力電器舵手董明珠，佢喺去年除咗帶領公司勁賺34億元人民幣，仲出書講自己如何由一個售貨員捱到當上總舵手嘅辛酸史；其他上榜嘅仲有排第9位嘅玖龍紙業（02689）執董張茵、排26位嘅華寶國際（00336）主席朱林瑤、排27位嘅中國電力（02380）主席李小琳、排28位嘅SOHO中國（00410）總裁張欣，以及排47位、由記者轉行變做「地產女王」嘅中國女富豪──龍湖地產（00960）老闆吳亞軍。
余絲韻