港交所（00388）一直以嚟都將經紀分成3組，市佔率排第1至14名為A組，排第15至65名為B組，排第65名以後為C組，即係大家所謂嘅大、中、小經紀。不過近年隨着市場環境變化，有經紀同絲絲講，話分成3組嘅作用其實已經唔大，至於係咪要取消呢個陪伴咗大家多年嘅A、B、C組排名，就值得大家深思！
點解咁講？絲絲要講番啲歷史，話說當年將經紀分成3組，係因為港交所未上市前，聯交所理事會嘅部分理事係由經紀選出，為咗唔想側重某個界別嘅經紀，就分成3組，A組經紀有4名代表喺理事會，B組有5名，C組就有9名。
但自從港交所上市後，遊戲規則已改變，董事由股東選出，因此將經紀分成A、B、C組，理論上已冇需要。
再講，當年係按成交額分成3組，排第1至14名係A組，但時移世易，依家排名已有好大轉變，有可能排頭幾位嘅已佔咗三分之一成交都未定。
既然唔使選理事入交易所，排名又未能反映真實情況，仲有冇需要「夾硬」分成3組，可以討論一下。港交所行政總裁李小加一向有唔少新思維，係咪應該諗諗佢？
余絲韻