絲絲講場：大福易名海通開P賀「掛牌」
大福證券（00665）去年「北嫁」海通證券，前日宣布正式將股份交易名稱改為海通國際，下周一起就生效喇！海通就特登喺下周一於五星級酒店搞咗個Party，賀一賀佢，仲會展出全新嘅「嘜頭」添。
改派新「嘜頭」卡片
大福去年收足「禮金」幸福「出嫁」海通後，遲遲都未同港交所（00388）講改名，股份仲係用緊大福個名嚟Trade。不過，據喺大福做嘅老友話，有啲員工都已經派緊改印海通「嘜頭」嘅卡片。
講番下周嘅正名大典，由於大福、海通係香港、上海聯婚，所以出席嘅嘉賓亦匯聚中港名人，上海嘅代表係上海金融服務辦公室副主任石琦。大福行政總裁黃紹開及海通主席李明山亦會出席，仲會即場播放全新嘅企業廣告及短片添！
余絲韻