美元貶值相信係長線趨勢，近日美元兌主要貨幣回升，只係趁歐債危機作「死貓彈」，美元唔值錢令港人深受其害，就連全球最貴商舖租金排名都要執過位，澳元大升令澳洲嘅悉尼霸咗香港嘅第2位，香港就被迫跌落第3位。
咁多年嚟，美國紐約及香港嘅一線購物區商舖租金，都穩守全球呎租最貴嘅頭兩位，但今年第三季嘅情況已有所改變。
世邦魏理仕嘅一份零售商舖租金報告話，今年第三季澳洲悉尼嘅一線購物區每方呎舖租，折算港元計約為792元，較香港約723元高出逾9%，舖租排名升至全球第2位，香港就跌落第3位，英國嘅倫敦就排第4。唔通係因為澳洲經濟好轉，當地業主猛咁加租？地產界老友話，國際性報告都會以美元計算物業價值，過去半年澳元匯水係咁升，折算番美元就等同租金升咗，而港元就與美元掛鈎，一拍埋就輸蝕咗。
因此除咗悉尼之外，澳洲嘅墨爾本亦由第12位躍升至第10位，連同維持喺第9位嘅布里斯班，澳洲總共有3個城市舖租躋身十大最貴行列，係眾地區中最多城市入選。至於紐約舖租仍高達每方呎1,170元，遠遠拋離悉尼及香港。
余絲韻