市場熱線：山水水泥有運行

消耗性上升之後，依家又嚟陰乾式下跌，再一次證明「相反理論」正確，事後孔明個個識講，因為太早「獨具慧眼」早就畀人挾死，大多數散戶係升市買熊證、跌市買牛證，所以呢排又係死傷枕藉。

投資者雙眼畀QE2蒙蔽住，加埋大孖沙搖旗吶喊話睇3萬點樓上，結果今次中晒招。美匯指數重上79樓上，即係QE2之後美元突施回馬槍，不跌反升4%。

商品股繼續捱沽

今次唔係「狼來了」，而係「豬來了！」年中時初發病嘅歐債危機三扒兩撥就冇事，歐元跟住仲狂升，呢次劇本掉轉讀，主角換咗愛爾蘭，但溺水嘅人唔急，周圍嘅人反而更心急，西班牙同葡萄牙驚住被拖埋落水，到時多幾個水泡都唔夠用。

美元升就油金跌，尋日祖國有12種商品期貨再跌停板，商品股自然首當其衝，A股又係到下晝至係戲肉，滬綜指先係幾乎收復失地，臨尾一粒鐘卻低收近2%。食品股續捱沽，如果實施價格管制雖然好擇使，但成本亦降低，並非想像中咁差。港股尋日升幅榜就包括德興（00611）同稻香（00573）呢類酒樓股，食材平咗，生意亦好做。

逆市奇葩仲要提埋中國消防（00445），上海教師公寓大火之後升咗兩日，防火安全意識增加可以帶動公司嘅消防系統同消防車銷售，但呢兩、三年成績表的確令人失望。

雖然話港股連日回落，但對於低位坐貨嘅股友嚟講有排都未入肉，好似前兩日10送10紅股除淨嘅濰柴（02338），高位跌兩成只係濕濕碎，同七月初低位仲有成倍利潤。

反而資源股純粹睇資源價格簡單得多，資源價跌起碼工業股有得抖氣，而煤炭價跌則對電力、鋼鐵、水泥等股有利，尤其係水泥股，祖國嘅限電令帶挈水泥價格回升，而前排中央宣布「水泥下鄉」搵山東同寧廈做試點，山水水泥（00691）咁啱業務集中喺呢兩個區域，所以股價跟住砌上；如果只係炒消息嘅話，佢股價應該好快回落，但隻股卻相當硬淨，就連呢排魚缸調整，佢仍屹立不倒。

識得跟住國策走

山水除咗係山東同遼寧兩省最大嘅水泥企業之外，公司亦好鍾意跟住國策走，所以響應咗新疆大開發號召，八月為新疆喀什兩條日產5,000噸熟料及年產600萬噸水泥粉磨站項目動工，總投資20億人仔。山水明顯係行運，建材下鄉都揀正佢嘅基地做試點，又識得配合國策，買股「寧買當頭起」就屬於呢類。

戰報

中能控股（00228）+5.6%

兩日插咗八百點，詩詩介紹隻中能控股全日都無跌過，即市最高見過0.47元，升幅5.6%。

恒芯中國（08046）+11%

古晨於周二推介恒芯中國，當日一度高見1.41元，較推介日低位1.26元，升11.9%。

古勝