Google打算加人工為咗挽留人才，點知留人反而變炒人。CNN爆料話，Google周二發出內部Email話會加人工一成，結果便條外洩，公司喺一粒鐘內就怒炒洩密者。
Google為咗提升士氣兼避免人才被對手挖走，早幾日透過內部Email通知員工會加薪10%，全體2.3萬名員工都受惠，呢件本來係喜事，唔知啲員工係咪太開心，有人將呢個好消息Forward咗出去，結果畀報章報道咗出嚟。
CNN嘅線人爆料話，消息一出，喺一個鐘頭之內，Google再度通知員工，今次唔係喜事，而係公布已經炒咗洩密者，好彩公司冇話收回加薪嘅決定。CNN向Google求證，發言人就話唔評論內部事務。
Google喺早幾個星期已經損兵折將，例如Google Map嘅始創人Lars Rasmussen剛啱起身過檔Facebook，理由係話Google愈來愈大，開始難以發揮才能。Google今次加人工本來係提升士氣，但結果變成炒人損士氣。
余絲韻