滙控（00005）嘅業務足迹遍布全球，工種自然多過好多企業，為咗令員工可發揮所長，滙豐首次推出調職計劃，鼓勵員工內部轉職，嘗試出任其他地區嘅工作崗位，有助事業更上一層樓。想突破依家嘅框框，又或者係依家做得悶悶哋嘅員工，不妨考慮吓，對自己及公司都係好事。
滙豐向員工公布呢個消息之餘，仲喺最新員工通訊內訪問咗已喺滙豐打工超過12年嘅「過來人」Cameron Senior，等大家可參考吓佢嘅經驗。
Cameron之前喺澳洲、英國工作過，依家就喺香港出任亞太區個人理財業務Senior Customer Propositions Manager（高級客戶事務經理）。
Cameron向有心人畀貼士，話要成功內部轉職，最緊要夠主動，自己亦有需要向直屬經理提出升職要求。有心人不妨參加喺下周三至下周五舉行嘅首屆事業博覽，不過只限內部員工參與。
滙豐待員工不薄，對客戶亦唔差，唔知係咪擔心分行排隊嘅客戶等得太耐，加上秋風起，佢哋喺上月中曾於北角分行派竹蔗水畀客戶潤喉，最近又喺西灣河分行派蘋果批果腹，包裝封套仲貼上「甜蜜蜜‧增活力」嘅字句，唔知下次會派乜嘢呢？
余絲韻