騰訊（00700）與奇虎360嘅衝突搞到滿城風雨，騰訊股價變得好「折騰」，早兩日主席馬化騰至形容，事件係「公司過去12年遭遇嘅最大危機」，點知第二日寫信畀全體員工，話360事件「不是公司最壞的時刻」，又勸大家放下憤怒，抓住時機，完成一次蛻變嘅機會。
受到360「扣扣保鏢」惡意軟件嘅影響，騰訊上周三即時終止所有掛上呢個程式嘅電腦之QQ戶口，馬化騰喺公布業績當日順便解畫，仲形容事件係「公司過去12年遭遇嘅最大危機」，又指自己「仍感到事件未完全脫離危險」。
好多人都知性格較為內向嘅馬化騰，甚少好似其他內地IT老總咁高調向員工公開發表「精神講話」，但前日佢出席公司十二周年慶典後，特登寫信畀全體員工，話自己不善言辭，所以選擇以郵件方式與員工溝通。馬化騰話360事件令一種同仇敵愾嘅情緒喺公司內部發酵，好多人都將360視為敵人，但歷史亦證明憤怒燒掉嘅只可能係自己，又指若非對方發難，公司上下絕對唔會有咁多反思與感悟。佢希望透過結束呢場紛爭，抓住時機完成一次蛻變嘅機會。
余絲韻