孖妹缸湖遊：「牛三」真有阻滯？

回顧九二年《大時代》後，「秋官」主演12套電視劇在港播出後首周嘅港股表現（見附表），恒指只錄得5次升，有7次下跌，每次都跌得幾甘吓，最多跌幅達8%；而第二周通常會跟隨之前一周嘅方向，上周恒指以跌市收場，股友宜小心入市。

除咗《秋官效應》，股壇原來亦有《丁生效應》，係由敦沛期貨行政總裁丁世民引發，佢講笑話自己「飛」得愈遠，大市就會冧得愈多，紀錄包括八九年中澳貿易關係劇變令澳元大跌、「911」事件、○八年四月貝爾斯登瀕臨清盤及雷曼爆煲，當時丁世民都咁啱外遊，喺上海、法蘭克福及東京公幹，佢嚟緊會去南京，希望《丁生效應》今次會失靈喇。

反「牛三」仍處「熊二」底位8500

丁︰敦沛期貨行政總裁丁世民

莉莉︰恒指技術上已突破去年十一月高位，你認為目前港股處於邊個階段？

　丁︰根據個人數浪方法，由○七年高峰跌落嚟至今，大市仍處於「熊二」，○八年十月嘅10,676點踏入當中嘅第一升浪，去年三月展開較長嘅第三升浪，所謂嘅「牛三」已過，依家其實行緊第五升浪，升幅可以好癲，較樂觀嘅人估計會升到25,000點，但我預計今次第五升浪會好似第一升浪咁維持一個月，若本月見唔到24,000或25,000點，就證實我嘅數浪方法正確，早前嘅23,866點已見頂。若每日波幅達400至500點以上，係大市轉勢嘅訊號。

高妹︰恒指最差會跌到幾多點？

　丁︰若恒指收市連續兩日跌穿22,400點，市場確認大市已見頂，恒指會應聲下跌至21,800點。我估計人行喺今年聖誕節前會加多一次息，股市樓市會作出重大反映，恒指明年中會跌到11,000點，形成大型雙底，不過若純粹數浪，最差係會跌見8,500點㗎！但歷時好短暫，明年中就會見底，之後恒指會掉頭向上升至34,000點，但將會係二○一四年至二○一五年嘅事。

莉莉︰你嘅預測好嚇人，乜嘢係大跌市嘅觸發點？

　丁︰第一次QE前後印咗1.7萬億美元銀紙，料QE2規模冇上一次咁大，目前港股價格已反映對QE2嘅預期。另外，歐美國家嘅GDP比重佔全球仍然最大，12個中國人嘅生產總值只等於一個美國人，全球經濟增長好難單靠新興市場經濟復甦，唔能夠抵銷歐美衰退局面。仲有較少人提起嘅係美國收樓事件，收樓程序步伐緩慢，好多人白住銀行物業幾個月，斷供潮仍然嚴重。

油金見頂藍籌勿追

高妹︰依家散戶要避開邊一類股份？

　丁︰澳元、油價及金價已見頂，亦唔好買升得最勁嘅藍籌如港交所（00388）、騰訊（00700）及和黃（00013）等，至於資源股、汽車股及濠賭股如金沙（01928）亦不宜沾手。

莉莉︰咁應該買乜嘢資產避險？

　丁︰中長線一直睇好鈀金，有興趣可透過美國市場買入相關嘅ETF（交易所買賣基金）；中移（00941）及滙控（00005）兩者中較偏好前者，有回歸A股概念，加上其網絡供應喺內地市場做得最好。

高妹︰你嘅投資咁穩陣，○七年大牛市時，你幾時沽晒啲貨？

　丁︰○五年中恒指由14,000點回升時開始入市，恒指升到○七年七月嘅23,557點後插落19,386點，我就放晒啲貨，享受唔到升上31,958點嗰部分，不過我覺得賺錢賺咗「魚腩」部分就得，唔使賺盡「魚頭」及「魚尾」嘅。

撐「牛三」健康回吐高位33000

關︰經濟學家關焯照

有人將《秋官效應》用「自學實現預言」解釋，即係心理影響行為，話事情講講吓就會成真。依家好多人話大市準備進入「牛三」，可能願望有日會成真，經濟學家關焯照係鮮有肯定港股今年八月底已進入「牛三」階段嘅財金界人士，過去佢嘅測市準繩度幾高，例如「神華101」（瑞銀調高神華（01088）目標價至101元）呢件事令佢深信個市開始見頂，於是成功避過○七年大跌市一役。

莉莉︰上周恒指累跌逾400點，你嘅立場有冇改變？

　關︰今次健康回吐係我預期之內，只要恒指喺22,700至23,100點嘅安全波幅內，相信我對「牛三」嘅推斷仍然正確。近期成交量明顯增加，動輒達千億元，最差都有800億元；最重要嘅「牛三」炒作主題係英、美、日等國家會持續推出QE，雖然預計措施不能帶動實質經濟上揚，最後發達國家要向全世界認錯，但亞洲區或新興市場嘅資產泡沫已被推高。

日漲千點高度戒備

高妹︰你認為「牛三」最癲會升到幾多點？

　關︰經過今輪短期小型鞏固後，若恒指再企穩23,100點，估計今年底會升至26,000至27,000點，但未到「牛三」終點，以起點（八月底時嘅20,372點）升四成至六成半幅度計算，最樂觀估計明年中會見33,000點，高過○七年高峰。

莉莉︰「牛三」幾時會出現每日大升1,000點嘅情景？

　關︰初期會逐級穩定上升，每日以約500點波幅推高大市，當去到每日升逾1,000點時，即所謂嘅「消耗性尋頂形態」，你就要小心，大市調整好快來臨。

高妹︰應該買定乜嘢股份度過「牛三」好呢？

　關︰初期唔使咁快買藍籌，可以繼續吼實潮流股包括內需酒類股及汽車股，如銀基（00886）、通天酒業（00389）、華晨（01114）及吉汽（00175）。部分內銀股業績唔錯，工行（01398）及建行（00939）亦值得吸納，較保守嘅投資者可選擇大落後嘅中移。

42%人料QE2撐升港股

市場預期美國將會喺本月初公布QE2，「印銀紙」以拯救經濟，但有謂「傳言前買入，證實時賣出」，你擔心消息落實後，港股會大跌嗎？據今期《東方產經》網上民意調查，截至上周末晚上6時，12.6%人話唔擔心，42.6%人仲認為大市會反彈，至於話擔心並認為會跌500點或以下、跌501點至999點以及跌1,000點或以上嘅，就分別佔6.2%、11%及27.6%。

高妹、莉莉

若有料報畀高妹同莉莉或有嘢問，可電郵money.biz@opg.com.hk