市場熱線：東航盈利有保證

先講聽日嘅花旗中期選舉，原來「在野」不嬲佔到優勢，民調亦對民主黨不利，但就算奧巴馬日後遇施政困難都係以後嘅事，同後日聯儲局議息嘅即時影響冇得揮。至於個QE2聽落幾恐怖，規模由2,500億美金到2萬億美金都有人估，總之5,000億美金係「最低消費」，但如果太多又驚失控，總之就係「大頭佛」。

個恐慌指數（VIX）已經升定先，魚缸係咪「高處不勝寒」呢？所謂世事無絕對，好似祖國創業板到解禁高峰期卻升到飛起。奇就奇在，花旗魚缸不知幾硬淨。話晒「印銀紙」效應係催生資產價格飆升，本港樓市已收唔到掣，股市就算調整都係好有限，大把資金等住趁低吸納。

上周五恒指跌114點，國指跌158點，都係祖國金融股累事，而周五主板成交達1,359億元，淨係友邦（01299）已佔咗接近500億銀，隻股亦令班fans喜出望外，古勝原本諗佢可以學農行（01288）咁慢慢升，但結果首日已升17%，股價對內涵值約1.5倍，同紅色保險股及宏利（00945）比，已經唔算吸引。

在下呢排叫人唔好立亂炒業績，成績好嘅升少少，但成績差嘅狂插；上海電氣（02727）同東方航空（00670）係特殊例子，前者升係因為攞咗印度大單合約所賜，而東航頭三季盈利已超過孖屐全年預測，第三季嘅收入同盈利增長亦係三間內地航空公司最好嘅。

高鐵暫未構成影響

大行即刻調高東航嘅盈利預測，高盛將佢未來3年嘅盈測分別調高40%、21%同16%，目標價升到7蚊。

前排好多人仲驚高鐵會搶走航空公司嘅生意，但航空股第三季成績表反而錄得高增長，不過東航未來仍會加快拓展國際航線飛機編隊。

東航業績好，同上海世博都有關係，機票價格加咗約兩成，乘客量同貨運量分別升60%同62%，另外合併上海航空帶來貢獻。

雖然世博啱啱落幕，但對上海升呢做國際城市有份貢獻，對東航嘅長遠收益有一定幫助。上海來往杭州嘅高鐵近期開通，車程只係45分鐘，部分高鐵線難免會同飛機構成競爭，但東航已經唔再係三大航空公司嘅「爛茶渣」，評級同展望都好過南航（01055）同國航（00753）。

戰報

宏華集團（00196）+17%

古晨喺十月八日推介宏華走勢對辦，上周五高位見1.17元，較推介當日低位1元高出17%。

中國鐵鈦（00893）+17%

桃桃十月十八日推介鐵鈦，指集團盈利前景佳，上周三高見4.14元，較推介日低位最多升17%。

古勝