絲絲講場：思捷印度行善建兒童村
大家都知道善心係無國界、跨種族嘅，思捷（00330）一眾高層最近就去咗印度孟買，幫國際慈善組織SOS成立一個新嘅兒童村，佢哋仲搵嚟榮獲奧斯卡提名嘅女星瑪姬佳蘭賀（Maggie Gyllenhaal）以及其演員老公彼得沙士格（Peter Sarsgaard），共同擔任慈善計劃嘅全球親善大使添。
SOS兒童村計劃係希望防止父母棄養孩童，以及幫助嗰啲已畀人遺棄嘅小孩獲得居所，而因為貧窮而被迫分離嘅家庭亦可以再重聚。原來思捷早喺○八年已經致力推廣呢項計劃，集團行政總裁范德施（Ronald van der Vis）今次仲聯同親善大使，一齊為新嘅兒童村進行揭幕禮。
擊鼓行動齊來參與
近年思捷已經喺印度收養咗140個小朋友，仲建立咗14個由新家庭組成嘅村落，所有費用都係佢哋全額資助㗎。
思捷打算向呢個新嘅兒童村捐款50萬歐元，不過就要大家「幫吓手」嘞。由下月初起，思捷會喺全球11個城市嘅門市擺個超級巨鼓，等大家去「敲響愛心」，仲有網上虛擬巨鼓，一樣可以敲，當全球嘅鼓聲累積夠300萬次，思捷就會將善款投入兒童村。范德施話，咁做係想與顧客共享慈善嘅熱忱喎。
余絲韻