秋高氣爽，踩單車係假日消閒嘅好活動，唔知法國興業銀行係咪同絲絲諗法一樣，佢哋喺今個禮拜六、日舉行北京市至長城慈善單車活動，等員工同埋佢哋嘅親友都可以一邊做運動，一邊欣賞吓風景。北京風景咁靚，加上剛啱入秋，參加者分分鐘可以見到區內樹葉由綠轉紅嘅變化，真係好浪漫呀！
今次活動唔係比賽性質，以耗資近40億元建造嘅北京「鳥巢」國家體育館為起點，慕田峪長城為終點，兩日車程總共有135公里，目標係籌最少48,000歐元（逾52萬港元），所以每位騎士都要籌600歐元（約6,507港元），善款會捐畀8個慈善團體作教育等用途。其實去年法興都喺巴黎及倫敦舉辦過同類活動，今次係第一次踏足亞洲，唔知下次佢哋仲想去邊呢？
余絲韻