絲絲講場：滙豐星級義工獎1日假
成日聽到諸如星級大廚、星級髮型師嘅稱號，去形容嗰啲喺行業內享負盛名嘅佼佼者，但估唔到原來做義工都可以榮登星級之列，絲絲講緊嘅，就係滙豐銀行舉辦首屆「滙豐星級義工計劃」嘅51位得獎者，佢哋全部獲得一日額外假期作為獎勵。
除咗以假期作獎勵，得獎者日前仲可以出席滙豐義工晚宴，與「星級銀行家」——滙豐亞太區行政總裁王冬勝（Peter）以及一眾管理層共進晚餐添！Peter席間大讚得獎義工同事好似佢心目中嘅星星咁，為受助人帶嚟盼望及溫暖，呢個比喻真係夠晒Sweet同埋親切喎，相信得獎者都會好受落。
「星中之星」一年走69場
滙豐義工隊由一九九三年成立，至今已有超過5,000名成員，佢哋每年都會與好多社區機構合作，籌辦逾200個服務計劃。今年得獎義工當中，就有一位「星中之星」義工喺過去一年參加咗69項活動，服務時數超過370小時，即係每個周末都會參與義工活動，呢種無私奉獻精神實在好值得學習。
余絲韻