恒地（00012）剛啱宣布以北京商場項目換咗銀泰百貨（01833）嘅7.74%股權，恒地太子李家傑（Peter）仲會入埋銀泰做非執董，可見雙方嘅夥伴關係。絲絲尋日終於搵到身在內地嘅Peter，心情靚極嘅佢講咗呢單「刁」嘅古仔，今次交易為恒地全數進帳16億元，「四叔」李兆基肯定以佢為榮啦。
Peter話，燕莎友誼商場其實早喺九三年興建，當時係北京市政府及新加坡公司搞嘅中外合資公司，嗰陣內地根本唔興百貨店，所以經營狀況麻麻，但Peter就睇好中國零售業前景，用好平價錢買咗三分之二股權，兩年後再買埋餘下三分之一，合共只係用咗2億幾。
佢笑住話，經營咗咁多年，嗰2億幾其實經已收回成本，依家全中國零售業一片火紅，所以可用16億幾作價賣畀銀泰，仲係淨賺，將喺恒地本年度帳目入帳，證明咗佢嘅投資眼光夠準、夠長遠。
Peter唔要錢而選擇要銀泰股權，亦係因為長遠睇好銀泰未來嘅全國百貨店策略，如果有好嘅項目，相信恒地都會考慮合作，有錢齊齊搵。
余絲韻