市場熱線：中國海外強勢畢現

美金只係輕微升咗一日咁大把又腳軟，宣布完成反彈，寫稿時美匯指數已跌到77邊，歐元衝1.40在望，日圓因為驚住干預令炒家唔敢咁狼。

總之美金走勢咁弱，全靠個「最大貨幣操縱國」搞風搞雨，聯儲局上月嘅會議紀錄顯示應該再「放水」，依家孖屐估下月初開會出QE2嘅機會已高達9成，問題只係放多抑或放少，喺大家估估吓嘅階段，魚缸有大半個月「不死之身」，至於到時QE2規模能否令市場滿意則係後話。

「置安心」計劃得啖笑

講番個施政報告，樓市係重點之重，投資移民唔畀買樓，較原先預期提高門檻落重咗藥，但應該影響唔算大。個「置安心」係得啖笑，得1,000個單位令人想起「僧多粥少」呢個成語，由二○一四年起好樓，用盡優惠要等多5年，學「柴九」話齋：「人生有幾多個10年？」等你同個女朋友分手都未買得切樓。至於話管制發水樓就早應該要做，只算係保障消費者行為，但對本地地產股嘅暴利有一定影響。不過，本地地產股上晝插完之後，超人旗艦（00001）收市已倒升，其餘只係微跌；無論政府點出招，都頂唔住QE2、QE3、QE4……嘅威力。

祖國尋日公布兩個數據，上晝個九月外貿就麻麻哋，但下晝個新增貸款則幾令人驚喜，滬綜指錄得5連升，港股小回之後又大漲，「牛三」通行無阻，水泥股大炒「建材下鄉」，呢單嘢早喺年初放風，原本以為不了了之，點知又突然殺出，山東同寧夏兩個試點夠晒特別。

建材下鄉係好主意，你見個鄰居間屋由兩層加高到三層，基於妒忌同唔衰得心理，人起我又起之下，農村消費就會帶起。

放完黃金周返嚟，祖國地主股已經異動，但只係細隻嘅炒起，兩大地主——中國海外（00688）同潤地（01109）尋日先至郁，分別升2.71%同5.35%，中海個價同一個月前所差無幾，唔使講同恒指及國企比係大落後，同佢姐妹中國建築（03311）更係冇得比。

大地主勝在水頭足

中國海外於九月銷售額達81億元，同比增長78.6%。中央猛咁落藥兼抽緊地主銀根，對班小地主影響最深，但大地主水頭充足，所以都係龍頭股穩陣。

祖國同香港一樣，通脹、熱錢流入、人民收入上升等因素不斷刺激樓價，所以用「不熄之煙火」來比喻，等風聲冇咁緊又蠢蠢欲動，到依家為止，中央一出招只係短期令交投減少，但樓價一路都好硬淨。睇番未炒過嘅藍籌股已經冇乜，思捷（00330）同富士康（02038）業績差除外，中海應該可輪到。

戰報

金山能源（00663）+21%

古晨本月七日指金山能源股價見異動，昨高見0.224元，較推介日低位0.185元升21.08%。

山水水泥（00691）+17%

高仁周一表示山水水泥可受惠於「十二‧五」規劃，昨見高位5.78元，累升達17.95%。

古勝