招行（03968）上市已有一段時間，最新嘅中期業績都好亮麗，行長馬蔚華並冇自滿，佢剛啱至完成分行行長年會，只有一個目的，就係要為第二次轉型做準備，馬行長仲將「張飛」及「悟空」搬埋出嚟。
「鳥在籠中，關羽不能張飛；人處世上，八戒還須悟空。」馬行長出差福建途中，喺一個偶然嘅機會下，遇上咗呢幅沉寂凡塵嘅老對聯，馬行長唔單只推薦畀全行員工，作為招行嘅座右銘，依家仲成為二次轉型嘅基石。
馬行長係咁樣解讀嘅：「關羽不能張飛」係指招行如果唔將一啲權力下放，就好似束縛咗嘅翅膀，難以「張飛」；下放權力後又點呢？「八戒還須悟空」嘅「八戒」係指各種必要嘅制度，「悟空」可以理解為招行嘅風險文化，當文化深入人心，制度就可以有效咁執行。
馬蔚華希望用3至5年時間實現二次轉型，喺呢個基礎上，鍛造出一個喺國內外都具有較強競爭力及可持續發展能力嘅「新招行」。
今次嘅分行行長會議，與會者係招行各地嘅分行行長、總行高層及各部門負責人，佢哋要喺5分鐘嘅發言時間內，分別介紹所在分行嘅兩個問題及一個亮點，再由總行各部門點評，講問題要講中要害，點評就要一針見血。
余絲韻