近期股市炒到慶合合，恒指仲創咗金融海嘯後嘅新高，唔少大行喺呢個時候都四圍挖人，點知最近市傳工行（01398）旗下工銀國際嘅資本市場竟然「逆市大地震」，唔單只有4位員工遞咗辭職信，兩名執行董事亦喺上周五「起身」添！
工行近年銳意發展投行業務，去年將聯營嘅工商東亞賣走後，成立工銀國際實行自立門戶，早排參與咗巴西石油嘅全球最大規模配股以及友邦保險（AIA）上市，絲絲聽老友講，話工銀國際之前仲出咗內部通告，要追趕中金成為中國最大投行，所以聽到佢哋「逆市大地震」都不禁有啲愕然。
有老友同絲絲講，話今次工銀國際「地震」應該係與換咗話事人有關，皆因新話事人係工行內地分行行長出身，之前從未做過投行，因此軟硬兼施將一批來自外資行嘅高薪員工換走，實行大清洗，換入一班人工低一截嘅內地員工頂上喎。不過絲絲覺得經驗係有價嘅，呢班來自外資行嘅「賓卡」係有佢哋值錢嘅地方，今次換血決定係咪正確，就真係見仁見智喇。
余絲韻