信銀招待貴客 授茶葉「炒」藝
本港投資者除咗對傳統嘅投資工具有興趣之外，近年亦積極發掘具升值潛質嘅另類投資，好似鐘錶、紅酒、珠寶咁。信銀國際最近搞咗兩場「品茗怡情」賞茶會，喺中華廚藝學院招待咗近240位CITICfirst財富管理服務嘅客戶，令客戶喺歎茶嘅同時，認識茶葉嘅珍藏價值及投資秘訣。
專家講解兼教入饌
喺今次活動，信銀國際仲邀請咗中國國際茶藝會會長廖子芳及囍宴老闆余健志（Jacky）擔任嘉賓。原來投資茶葉係一門好高深嘅學問，廖子芳就同絲絲講，話茶葉嘅年份、產區、製茶廠以至包裝等，都會影響茶葉嘅投資價值，但由於市場對茶嘅文化未太熟悉，所以茶葉炒賣活動至今仍未成熟。
另外，同場嘅Jacky除咗有份幫活動設計部分菜式以茶入饌外，仲即場示範教整菊花茶果凍，絲絲睇見信銀國際執行副總裁兼財富管理及零售信貸部主管劉月屏（Zoe）全程聚精會神咁學師，細問之下，先知道原來事業型嘅Zoe好熱愛下廚，但因為工作繁忙，所以甚少機會享受入廚樂。
余絲韻