絲絲喺度公布一個大喜訊，「輪后」朱紅（Niki）要出嫁喇！Niki將於下周三（十月二十日）與拍拖差唔多3年嘅「ABC」（American-born Chinese）男友共諧連理，以為佢嫁個西化老公應該會以西方儀式結婚，點知Niki與男友都好鍾意中式傳統禮儀，所以出門嘅程序都會做到足！
之前做過瑞信股票衍生工具銷售及市場推廣副總裁，又喺法興做過窩輪部門，Niki可以話係新一代「輪后」，其實佢喺大學畢業後都有做過股票分析員，佢同絲絲講，話覺得依家結婚係一個適合嘅時間，之前都冇特別計劃。佢搵咗師傅夾時辰八字揀吉日，揀閒日行禮擺酒係因為唔使同咁多人爭喎！
Niki笑笑口話，為咗籌劃婚禮，周圍咁問朋友及親戚意見，學吓又做吓咁，雖然以前返工搞Event仲忙，但依家心情仲係好輕鬆。梗係啦，結婚咁開心，幾多嘢搞都唔覺得忙啦！絲絲喺度衷心祝福Niki婚後生活愉快！
余絲韻