市場熱線：中化肥受惠扶農政策

人仔維持「龜速」升值

美元終於有反彈，前晚道指微升、油價下跌、金價再創新高，孖屐訊息都幾混亂。不過，到亞洲時段就慢幾拍陸續反應，東瀛魚缸跌200點，原油、黃金、歐洲魚缸、美股期貨統統都要跌，班專家估美元唔威得幾耐，花旗要刺激出口同還少啲債，所以美元有反彈冇升幅，但係短線各位要忍受吓「小回」嘅滋味。

尋日賣地有小小爆冷，華懋高價搶地，小甜甜兩件「遺物」——安寧（00128）同丹楓（00271）乘勢炒上。今日煲呔份施政報告個個金睛火眼睇吓佢對樓市有乜「符fit」，一般估計都冇料到，資助買樓可能更會對樓市火上加油，但地主股尋日有獲利回吐。騰訊（00700）做咗近排股王，前日兩間大行一齊調升目標價至200蚊過外，莫非又想抽水？

祖國魚缸零舍有性格，尋日先跌後升，4個交易日累積升約10%，人仔開市中間價則回軟，話之你所謂升值壓力，外匯局又重申：匯改唔等於升值，睇嚟人仔就算升值都只會以「龜速」進行。

雖然6間大錢莊真係提高存款準備金率，但時限只係兩個月，而幾個大城市陸續聽中央話限制人買樓，不過內銀同內房股走勢就「對着幹」，內房股比較奇怪，大大隻嘅中海（00688）同潤地（01109）跟住個市跌，恒大（03333）、越地（00123）同恒盛（00845）就大升特升。

五中全會呢個禮拜五開幕，「例牌菜」係炒吓農業股，但近年環保概念股有後來居上之勢。扶農政策力度冇咁強，原因係農民溫飽基本解決，農產品價格又不斷上漲，依家政策係鼓勵佢哋消費。

不過，農民逐漸有錢，揀農業股始終冇衰，除咗一拖（00038）之外，兩隻肥料股呢排走勢唔錯，農產品價格帶起埋肥料價，中海化學（03983）跟住條上升軌衝破6蚊，中化肥（00297）亦喺高位未見回落，似有突破迹象。

鉀肥價格有所回升

中化肥一路講緊阿媽爭買加拿大鉀肥公司Potash單嘢，近排消息少咗，鬼佬始終對「中國崛起」懷有敵意，成事機會未必大。但因為呢單嘢，鉀肥價格呢排升咗唔少，中化肥揸住A股鹽湖鉀肥攻生產，亦係Potash內地嘅分銷商，舊年生產埋磷肥。因為鉀肥價格問題，股價已沉咗兩年，但鉀肥價格今年到上升周期，隻股○八年股價曾見8.8元，現價只係一半，見今年初高位5.72元已好和味。

戰報

國美電器（00493）+11%

股博士九月三十日推介國美，昨日股價高見2.53元，較推介當日低位升幅達11.45%。

中國建築（03311）+22%

桃桃上周四指中國建築未來能維持盈利增長，股價昨日創52周高位，較上周四低位升22.41%。

古勝