金融徐筆:自創攻略投資半新股

平時一得閒就會出席新股嘅投資者推介會,對於一眾新股嘅基本因素、盈利前景以至管理層質素都有認識,所以都幾熱衷於投資喺半新股上,而且仲有一套自己嘅心法。記住半新股冇歷史數據,所以可以做基本分析嘅機會唔太多,準確性亦都唔高,所以筆者會嘗試用技術分析嘅投資技巧,從中自創出一套簡單又有效方法。呢套投資方法係透過觀察半新股上市頭5個交易日嘅最高價、最低價同成交量做參考嚟投資。呢段時間嘅交易表現對之後股價走勢好有指標性。

簡單啲嚟講,頭5日嘅最高價位係一個有效嘅阻力,一旦破咗呢個阻力,加上大成交,之後通常都會有一段唔錯嘅升浪。但係如果只能喺呢段區域橫行或者跌破底線,股價之後嘅表現都係麻麻哋或者收場慘淡,以上呢個方法又簡單又有效。練習吓啦!

華耐仍有水位

筆者好耐之前,曾經寫過華耐(01020),華耐其實係中國第二大高端鋼水控流產品製造商(約佔30%市場份額),加上內地鋼鐵板需求增長10%,同時行業內競爭壓力相對比較低。

從競爭優勢分析,華耐畀筆者睇到以下幾個點子:產品屬於易消耗品,只可以用2至15小時、原材料價格增長可以被轉移、主要大客戶多數都係內地前十大鋼鐵生產商、產品價格只係佔鋼鐵製造成本嘅小部分、現金流極度充裕。

華耐亦都分派今年財政年度嘅可供分派溢利至少30%作為股息。從技術分析嚟睇,華耐股價「困獸鬥」咗三個月,終於「獅王再現」,依家似乎又製造緊另外一個「困獸鬥」式格局。有大行睇佢1.2元,點止呢!昨日收報0.99元,空間感仍然足夠,都係嗰句,「繼續跟蹤,永冇放鬆」!

香港大學電子金融服務榮譽助理教授 徐燦傑

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率