「股神」巴菲特除咗靠投資賺到盆滿缽滿，佢嘅名氣亦幫到其他人搵錢，例如著名投資家Benjamin Graham嘅著作《Intelligent Investor》就因為有「股神」嘅簽名，賣到成2.525萬美元。
呢本書嘅買家Mitch Julis話一啲都唔嫌貴，仲好開心咁話若然小朋友鍾意投資，呢本書係留畀佢哋嘅最好資產。
呢本《Intelligent Investor》大有來頭，作者Benjamin Graham係價值投資者嘅提倡者，佢可以話為「股神」嘅投資之路提供咗指示，「股神」曾經話Benjamin Graham係對佢影響最深嘅人之一，佢19歲已經讀過呢本書。
呢本被拍賣嘅第一版書，本身喺一九四九年首次出版時只賣3.5美元。搵到「股神」幫呢本書「增值」嘅Patrick Wolff與巴菲特好有淵源，係巴郡股東，佢創立嘅慈善基金買咗呢本書，經「增值」後出售，所得嘅淨額會捐助其他慈善團體。
余絲韻