絲絲講場:香立智沽幻音功成身退

喺去年底上市兼且獲多位猛人入股撐場嘅幻音數碼(08248),尋日向聯交所申報,話其中一位大股東嘅持股量由22.57%減到0%,即係沽貨走人,呢位大股東就係已故「股壇怪傑」香植球嘅四子香立智。

伍步謙接貨 持股逾22%

邊個係收貨人?資料顯示,喺香立智出貨嘅同日,原本持有公司百幾萬股嘅伍步謙亦申報增持公司權益,股數與香立智減持嘅一樣,以每股作價0.465元計,交易作價6,532萬元,持股量增至22.82%。

特別嘅係,伍步謙喺九月底時話「因需為個人事務投入更多時間」,一口氣辭晒公司嘅獨立非執行董事、審核委員會及薪酬委員會成員、薪酬委員會主席嘅職務,生效日期係十月二日,即係佢申報增持日之前嘅三日,公司發言人話呢單純粹係股東嘅交易喎,仲話伍步謙應該唔會參與公司營運。

至於香立智今次有冇賺錢,絲絲就唔識計,因為當年佢幫公司上市,借錢畀公司,又為公司做借貸擔保人,部分借貸更已換成股份,變成公司股東,所以冇得計,但絲絲相信佢嘅歷史任務已經完結。

余絲韻

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率