喺「十‧一」黃金周，難得A股連日休市，絲絲唔少北方好友都選擇暫離煩囂，出外旅遊「叉電」，殊不知身在異地，卻飽受樓盤中介推銷員嘅電話、短訊轟炸，日接5個推銷來電，煩個不休。
喺中秋節假期，內地房產銷量唔錯，中介銷售人員當然食髓知味，希望趁「十‧一」黃金周做多啲生意，誓要賺番上半年啲佣金先心滿意足。
可惜事與願違，中央突然喺黃金周前再度出手調控內房，嚇走晒啲買家，搞到樓盤中介員工即時「坐晒喺度」，惟有轉變策略打電話「Call」客睇樓。
好多外遊同胞連日嚟接到多個追魂「Call」，仲有人將附有樓盤圖像嘅彩色短訊不斷傳送畀買家。呢啲附有彩色圖像嘅短訊一啲都唔平，搞到嚟香港旅遊嘅內地人要多付一筆漫遊費加彩訊費，佢哋講起都話覺得唔抵。
絲絲恐怕呢啲售樓電話兼短訊可能只係個開始，中央繼續打壓內房，業界嘅推銷手法只會更層出不窮，睇嚟北方好友要有更多心理準備「接招」，又或者考慮吓外遊時關掉手機，但求耳根清淨。
余絲韻