絲絲講場：星亮酒會賀二百周年
第一隻喺香港上市嘅德國企業星亮（00955），佢哋嘅母公司原來已有二百年歷史，認真犀利！絲絲聽講星亮母公司喺德國已舉辦咗兩場大型慶祝活動，尋晚就輪到喺香港慶祝。
中環靚景開眼界
依家做咗上市公司，使錢就更加要謹慎，為咗唔好嘥咁多錢，加上喺德國嘅慶祝都夠晒皮，所以星亮喺香港只係搞咗個小型酒會，象徵式咁請番幾十個朋友慶祝吓。
雖然要簡簡單單，但公司揀場地都揀咗好耐，最後揀咗中環一間酒店嘅頂樓，場地係細咗啲，但呢個場係二百七十度咁由玻璃窗圍繞，可飽覽中環夜景，加上仲有個露台，等大家可以行出去欣賞夜晚嘅中環景色。
香港人對慣咗呢啲夜景，可能覺得係小兒科，但德國人真係好少喺當地見到咁多高樓大廈，所以星亮先至唔揀一般五星級酒店嘅宴會廳。
絲絲喺現場見到人人拎住杯香檳，望住個夜景，成日嘅壓力都應該即刻冇晒啦！
余絲韻