港交所（00388）股價近期氣勢如虹，計埋尋日已經「六連升」，行政總裁李小加持有嘅港交所股份價值亦水漲船高，由今年五月公布獲授股時嘅總值900萬元，到依家已升至逾1,200萬元。
尋日港交所嘅披露股權資料顯示，李小加喺港交所嘅持股量增加咗1,050股，至7.42萬股，相信係早前港交所授予佢嘅股份獲派息時，信託利用股息再買股份所致。雖然只係1,050股，以尋日收市價163.4元計，約值17萬幾，對李小加嚟講可謂濕濕碎，但以佢嘅總持股量計，持股價值已升至逾1,200萬元，較初時嘅900萬元勁升三成三。
有中環人就笑言，話李小加近期咁勤力寫「萬言書」，為人民幣國際化把脈，提出成立人民幣「資金池」支持產品推出，佢嘅努力終於有所回報喇！
李小加今年一月上任港交所行政總裁，佢一年嘅底薪有720萬元。港交所今年五月公布，會撥出9,260萬元用作購入港交所股份，以獎勵合資格僱員，其中900萬元會獎予李小加，當時港交所股價只係約126蚊，估唔到短短5個月就升咗近三成。
余絲韻