港股上探23,000點過後進行整固，市況依然大漲小回。內地A股今日復市，勢成焦點，但政策市向來有冇得估，都是坐定定等睇戲。昨日推介的金山能源（00663）果然試圖衝0.2元關，收報0.193元，升4.89%。另一推介王朝酒業（00828）走勢更加亮麗，收報5.29元，升幅17.3%，有跟進上車者，真係醉得痛快！
油價回升，連帶從事石油周邊行業股份人氣亦有改善。從事油井鑽機及零部件等業務的宏華集團（00196），股價自去年六月見高位2.21元後，便展開漫長跌浪，一直回落至上月初低位0.86元後才轉向橫行，昨日股價異動，一舉升穿50日線0.96元，收報0.97元，成交1,756萬股，乃四月中以來最大單日成交股數。
當博見底回揚也好，抑或是長期超賣之下炒一浸反彈也好，只要短線回吐守穩10日線0.91元，相信唔會咁短癮，目標炒上七月高位1.13元。
古晨