市場熱線：銀建國際可塑性高

按過往經驗，逢親大關口都唔會一下篤穿，就算回落整固兩、三舊，唞夠氣再上破其實更健康，只要市底夠強就冇有怕。藍籌股升幅頭兩位係和黃（00013）同九倉（00004），和黃3G業務已由黑暗期轉入光明期，而作為大市指路明燈嘅港交所（00388）繼續創新高。當然，乜都係假，美金主宰一切。

「貨幣戰」愈演愈烈

美金好似食咗瀉藥咁，執筆時美匯指數跌到77.2，歐元逼近1.40，澳元直指1算，日yen最慘，又跌返干預前水平，好多專家已預言日本干預行動失敗，日yen下個位去到邊真係天曉得。依家情況以「貨幣戰爭」嚟形容並不為過，萬眾注目今日人仔復市點樣，睇吓係咪「威武不能屈」。

花旗國嘅民間就業人數減少，道指照升，但標指同納指則下跌，整體都係跌多過升。孖屐觀望尋晚公布嘅新申領失業救濟金人數，見報時大家已知道結果，就算數據差嘅話，亦可炒憧憬量化寬鬆，所以魚缸呢排有恃無恐，尾市期指炒高水，除咗博美股之外，好大程度亦博祖國魚缸今日復市有好帶挈。

照計，黃金周期間資源價格已大升，淨係資源股都好大期望，滬綜指應該有力再試2,700點關口，但呢個關口之前6次衝刺都失敗，好似一道銅牆鐵壁。

隻A50中國（02823）較NAV溢價達12.8%，尋日沽空金額達6.36億元，佔總成交超過四成，未必係睇淡，但顯示好多人做對沖或套戥。

創益（02468）令人失望，以差唔多接近全日最低位5.07元收市，比招股價僅升12.67%，高位追入者欲哭無淚。買新股其實難度好高，冇往績可稽，唔知幕後人乜嘢手法，敵暗我明好蝕底。

呢排啲新股好似已洩氣，今日掛牌嘅金風（02208）暗盤只係微升，下禮拜一上市嘅永暉焦煤（01733）亦不能期望過高。作為基礎投資者嘅銀建（00171）未必可發達，但佢有份投資嘅中國銀聯一旦上市，就相信會賺到笑。

主力能源相關業務

銀建呢十幾年來頻密轉型，原本諗住搞不良資產有睇頭，點知國策風向一改又冇得玩，但話咁快即泊到個大碼頭——中廣核集團。核電係國家未來重點發展項目，如果銀建分到一杯羹已不得了。不過，中廣核只係第二大股東，未必搵銀建做旗艦。而銀建今年先後用13億銀購入山西煤炭項目，又同兩大石油集團合資發展石化業務。

銀建股東背景複雜，業務亦都幾複雜，但歸根究柢都係同能源有關，美金有排弱，資源股則有排強，銀建勝在充滿想像空間，若能上返3蚊都仲大把水位。

戰報

亨得利（03389）+10%

帥哥上周三推介亨得利，指其股價突破上升軌後升勢持續，昨日創52周高位4.04元，累升10.68%。

明輝國際（03828）+20%

高仁周一指明輝獲對沖基金垂青，值得跟進，股價昨高見3.65元，較推介日低位3.03元，勁升20.46%。

古勝