做一個實戰教育家，唔可以畀人感覺太嚴肅，但又唔可以太「平」（即係太cheap啦），要做到「雅俗共賞」，亦都係筆者人生嘅其中一個目標，等更多朋友用簡單直接嘅文字，了解股市。
筆者唔敢講自己係潮人，但係就真係花唔少時間去睇唔同嘅潮流雜誌，潮流服裝梗係筆者至愛之一。睇我近期戴上嘅G-Shock白色潮錶已經可知一二，見到朋友係唔係都用身上潮流產品做指標，咁就肯定零售業務又慢慢從底部飛升，其中嘅佼佼者梗係今日要講嘅I.T（00999）啦！如果十年前，潮流依歸，必定係Espirt，今日就梗係追I.T。一般嘅服裝企業，以分銷管道起家，然後落地歸根，打造佢哋嘅品牌之後，再以佢哋嘅品牌衍生出一系列品牌，透過品牌槓桿打造一個潮流品牌嘅陣營，完全符合21世紀嘅品牌管理策略。
數一數，I.T嘅自家品牌真係多不勝數，有5cm、CHOCOOLATE……等等。未成形嘅繼續留喺阿媽度慢慢栽種，成形嘅就「不戀祖蔭」獨自闖天下。實實在在同阿媽講「春暉他朝報」，實在係孝感動天，咁有孝心，點會唔感動到一眾股民為佢送上無限祝福，股價一飛沖天。
I.T依家已經冇「往日頂」可追蹤，個個都話超買，如果經濟走入新周期，咁即係又步向另一個經濟市況嘅開始，咁樣喺呢個大前提之下，內需零售實冇走雞，加上配合「中國藍圖」嘅不敗元素，再加上品牌同溢利有直接關係，如果「高位回，成交低」，可以係一個機會走多轉都唔定。追蹤住啦！
為咗走在潮流尖端，一年後已經成功減咗5公斤，目的梗係型啦！仲使講！能夠穿上I.T嘅型格品牌，對我嚟講，梗係「裏應外合」，實在係無得頂。
香港大學電子金融服務榮譽助理教授 徐燦傑