中盈國金（00766）收購咗內蒙古同埋黑龍江嘅金礦之後，除咗着手營運之外，仲馬不停蹄咁出國推介，又帶團去內蒙古敖漢旗嘅金礦實地考察，唔知係唔係操勞過度，佢哋嘅業務發展部董事史冠倫仲「傷埋膝」，整親隻腳入唔到礦洞，只好由中盈嘅行政總裁宋建文負責帶隊。希望史冠倫快啲好番，可以再入礦洞親自督師喇。
之前中盈國金已經搵咗幾隻大基金好似富達及景順做股東，不過據絲絲所知，佢哋並冇停手，繼續會去英國及澳洲等地方推介公司，仲要喺監督內蒙古工程之餘，又要處理黑龍江嗰邊金礦嘅進度，所以都冇乜時間喺香港。
不過好彩敖漢旗嗰度都好企理，否則都幾難捱，宋建文都話比起第一次去之前想像中嘅環境好好多，而且敖漢旗當地政府都好想吸引多啲外商投資，例如興建生產廠房以及做吓資源開發咁，所以應該會好好招待佢哋，等人口耳相傳先至可以吸引人去投資。
余絲韻