絲絲講場：摩根理財中心落戶觀塘

摩根資產管理零售業務總監張嘉駒同絲絲講，話今次決定進駐觀塘區，係因為事前做過調查，發覺好多公司已經將辦公室遷移至東九龍地區，認為觀塘正轉型中，新中產一族逐漸聚集喺呢一帶，所以放棄選址傳統商業區，目的係希望將基金普及化，順道搞多啲投資者教育工作。

買賣基金唔使錄音

新嘅投資理財中心成立後，投資者又有多一個渠道買賣基金，張嘉駒透露，由於公司由證監會監管，而唔係金管局，所以買賣基金時唔使好似喺銀行咁錄音做紀錄，程序上會較精簡，但投資者事先都要填寫一份財務狀況嘅問卷。

摩根資產管理投資資訊總監崔永昌話喺新店開張當日，佢哋太平洋投資總監Piers Litherland以及香港銷售及市場業務總監潘新江都會出席，仲會邀請明星鍾嘉欣及「舖王」鄧成波一齊慶祝，至於有乜嘢優惠吸引投資者，就要賣個關子喎。

余絲韻