近年企業管治係好重要嘅課題，特別係上市公司，稍一不慎好易跌入陷阱。合和實業（00054）最近就有一個舉措，相信係與企業管治有關，唔知同佢哋嘅董事總經理胡文新做咗香港上市公司商會副主席有冇關係，因為呢個商會嘅主要宗旨之一，就係要搞好上市公司嘅企業管治。
話說合和嘅年報一直有描述一間名叫合信保險及再保險顧問（HCNH）嘅公司，但今年最新年報就唔見咗呢間公司嘅蹤影，老友話合和已賣咗呢間聯營公司。
查實合和只係揸住HCNH嘅25%股權，最大嗰份係屬於何炳章，佢透過一間公司持有HCNH五成權益。何炳章係合和老臣子，家陣依然係合和嘅副主席，HCNH過往有為合和及合和嘅附屬公司提供保險服務。
據老友話，合和早前已賣咗HCNH，大家已經冇股權關係，HCNH以前嘅Office都喺合和中心，依家仲搬走埋添，果然係完全分手。其實都好嘅，如果真係要搞好公司管治，細微嘅小節都要好小心，以免瓜田李下，惹人懷疑有利益衝突就唔抵啦，做得咁仔細，真係要讚吓胡文新喇！
余絲韻