唔知係咪樓市旺得滯，個別大型地產代理行正重新部署管理層職能，以把握時機搶佔市場。美聯集團（01200）主席黃建業尋日與集團一眾高層召開第四季生意策略會議之餘，就決定抽調3名猛將專注發展香港置業及中國部，話要令港置躋身代理業三甲，兼且要強化喺大陸嘅業務。
美聯集團高級執行董事黃錦康同絲絲講，話佢哋嘅香港業務已經做得好好，因此原任美聯集團董事兼住宅部行政總裁嘅伍創業，就調任並晉升至香港置業高級執行董事，希望可以將港置由現時喺代理業嘅第4位，跳升一級至第3位。
既然港置有新統帥，原本需要同時兼顧港置及中國部嘅美聯集團顧問張錦成，就可以做少啲嘢，未來專注於內地業務發展，集中精神尋找內地業務嘅發展商機，以及擴展業務網絡；至於現任美聯集團執行董事嘅葉潔儀，亦會參與多啲中國業務。
余絲韻