市場熱線：昆侖落後值得捧場

喺冇乜特別好消息嘅情況下，本地魚缸突然咁勁，唯一只能以「挾淡倉」去解釋，由九月升到依家嘅「殺熊行動」令班淡友非死即傷，但尋日啲短炒錢仍係流向熊仔為主。港股下個目標係挑戰23,000點大關，睇怕難度唔大，只怕升得太急會有「反高潮」。

各類資源股當時得令

大笨象（00005）同祖國移動（00941）齊齊重上80蚊關口，呢兩件大隻佬一直大落後，如果肯發力，恒指唔止23,000，24,000都不成問題。不過，最好景依然係資源股，正如古勝尋日所講，量化寬鬆搞到銀紙愈來愈唔值錢，喺無可選擇之下，揸住「實物」好過。

黃金周過咗幾日，至今統計話個人遊人數多咗三成幾，但係零售股因為之前已坐「嫦娥二號」升空，所以大多有獲利回吐，尤其賣衫股，並非個人遊旅客「飛佛」，而且遲早要再捱貴租。唯一例外係賣金股，呢排金價係咁創新高，淨係計存貨升值，今年成績表已經有一大筆「花紅」。

東瀛魚缸依然係亞洲最差者，結果倒跌收場，yen又升到83邊，今次再唔再干預呢？令菅直人更煩惱嘅當然係釣魚釣出個大頭佛，同中國friend會得罪班選民，依家又軍事演習、又四圍搵稀土，如果真係交惡則更大件事。中國同日本股市今年樣衰程度都係難兄難弟，若不能以和為貴，對經濟難免再傷，當然會係日本傷啲。

呢個月中祖國開五中全會決定「十二‧五」規劃，不離節能減排、淘汰落後產能，以前祖國開親大會都興炒吓農業股，但今時唔同往日，金屬、煤炭同水泥股喺汰弱留強之下反而受惠。

講開資源，天然氣亦係一種好重要嘅能源，但係燃氣股呢排零舍落後，雖然佢哋唔算係上游股，不過中央既然鼓勵用乾淨能源，需求肯定冇問題。在下推介隻昆侖能源（00135），由三月開始一路喺10蚊邊浮沉，唔升唔跌悶親街坊，等注資等到頸都長，但經驗告訴大家，橫行愈耐嘅股，爆發力愈驚人，耐性係始終有回報。

天然氣銷量持續遞增

雖然昆侖話變身做燃氣股好耐，但始終仍係大半隻石油股，呢排油價已升到81美金，石油股亦係咁升，隻股唔跟住升已冇道理。至於天然氣業務，今年上半年銷量增加52.8%，盈利貢獻增加咗93%，注資雖然慢啲，但一直做緊，未來係主要增長點。祖國今年將天然氣加價25%，住宅用氣近月已陸續加價，不明朗因素逐步消除，係時候追落後。

古勝