全國最大嘅電器分銷商之一國美電器（00493）嘅董事局近期出現大地震，波及咗公司嘅股價表現，唔少投資者粉絲都高度留意事態發展。國美嘅始創人兼大股東黃光裕同現任主席陳曉，因為意見不合而搞到大大鑊，成為一場舉世矚目嘅股權爭奪戰。
管理學有話：「有危，必有機」，就只有當公司身處危機之中，投資者先可以以一個較為相宜嘅價錢吸納股份。照依家情況睇，雙方都已經就事件作出相應嘅部署，等待九月廿八日舉行股東特別大會中為整件事做一個了斷。
若黃光裕勝出嘅話，可能要將佢私人擁有嘅400幾間分店注入上市公司，來換取更多嘅股權。咁樣，國美嘅上市公司將可以得到一個更為「升呢」嘅銷售網絡，增加公司整體競爭優勢。如果股權爭鬥觸發咗《收購及合併守則》嘅全面收購要約的話，投資者甚至有可能以高價出售手中持有嘅國美股份，達到「鷸蚌相爭漁人得利」。
國美最近就同南韓三星電子簽署價值300億元人民幣嘅兩年期銷售合作協議，展開涵蓋唔同類型全線家電產品合作，規模之大盡顯行業一哥風範。講到底，國美喺內地所擁有嘅龐大銷售網絡，唔係人哋一朝一夕可以追得到，管理層風波一旦平息，公司就可以繼續發揮規模經濟（Economies of Scale）嘅優勢，再次喺呢個全球最多消費者嘅市場中逐鹿神州。
香港大學電子金融服務榮譽助理教授 徐燦傑