絲絲講場：工行攬人才趨國際化
工行（01398）管理層最自豪嘅，當然係佢哋嘅盈利及市值都係全球銀行排第一，但除咗呢啲咁硬性嘅數字之外，愈嚟愈國際化嘅工行開始更重視「軟件」，即係人才，佢哋近排喺一個內地大學生嘅「最佳僱主排行榜」入面，仲拎埋第一名添。
工行話佢哋嘅策略係「人才興行、人才強行」，要「國際人才本土化，本土人才國際化」，與滙控（00005）嘅「環球金融，地方智慧」有異曲同工之妙。絲絲呢排又真係見到工行由上而下都國際化咗，皆因有德銀前亞太區副總裁張紅力加盟，喺國際大行請人加盟負責銀行實務，用人機制好明顯係一大進步。
內銀都有環球智慧
工行中層及下層員工一樣有好多國際化嘅人才，佢哋話去年喺海外請咗7名資深量化分析師、金融市場業務系統架構師等，依家工行有4,319名海外工作人員，只有6.85%係來自內地，其他都係外國人，睇嚟工行雖然畀人叫做內銀，但亦一樣好有環球金融智慧！
余絲韻